Quebec City

Irgeneinisch am Vormittag bini ds Quebec City (oder eifach nume Quebec) acho u chum bini usem Bus duse gsi, bini mer vorcho wieni uf Frankrich gfloge waer. Aues isch ploetzlech wider uf Franzoesisch gschribe gsi u vo Aenglisch ke Spur. Ds Quebec hani mi entschide mou nid ines Hostel ds go u drum hani vom mim "Couchsurfing account" Gebruch gmacht woni ds Miami eroeffnet ha. "Couchsurfing" isch e Internet-site wo mer sech cha amaeude u naer cha Mitglieder uf dr ganze Waeut afroge, oeb mer bi ine choen uebernachte fuer es paar Naecht. Im Gaegezug cha mer, we mer wider deheim isch, ds gliche abiete. Zerscht hani zimlech Bedaenke gha, dass sigi sone Hippie-Sach. Isches aber ueberhoupt nid wini ha doerfe feschtsteue. Auso hanis mou probiert u am Sebastien Tremblay vo Quebec gschribe. Dae hett mer zruegg gschribe u so hett sechs de ergaeh, dass i bi ihm ha choene ufem Sofa uebernachte fuer oeppe 5 Taeg oder so. Obwou aer Tremlbay heisst, isch aer mitem Meisterschuetz vom EHCB nid verwandt, Aer hett mer erklaert, dass Tremblay dr huefigscht Nachname in Quebec sigi.

Nachdaem i bi ihm ir Wohnig acho bi, hei mer Znacht gaesse u si ner mit sine Kollege ids lokale Pub gange. Doert hett e Kollegin vom Sebastien Geburi gfiiret, duer das hani grad zimlech viu Quebecois kenneglernt. Die si au zimlech guet druffe u vorauem o zimlech schnaeu im Bierkonsum. Uf dr chline Buehni im Pub hett eine typischi Quebecois Lieder gspiut u drum isch d Stimmig raecht guet gsi. Am Schluss vom Obe hani de de Iheimische no muesse zeige, waer dr meischter im Billiard isch u nachdaem si mer de langsam hei gloffe.

Am noechscht Tag hett dr Sebastien wider gschaffet u i bi chli god Stadt erkunde. D Autstadt isch eifach zimlech Europaeisch, hie stoe gloub die aeutischte Gebaeude vo Nordamerika. D Innestadt isch aber zimlech touristisch, i ha gloub nonie so viu Souvenir-Shops i eire Stross gseh. Ds Highlight vor Autstadt isch aber eiduetig ds "Chateau Frontenac", wo usgseht wi nes riesigs Schloss, drin isch aber es Luxushotel. Vo dr "Terrasse Dufferin" gseht mer naer ufe St. Laurent Fluss abe. Das isch scho zimlech imposant gsi. D "Citadelle" isch es angers Highlight vo dere Stadt, e auti Feschtig vo de Aenglaender wo mer vo usse gar nid gseht, wiu si ine Grashuegeu ine bout isch. Ds ganze franzoesische Flair vo dere Stadt isch scho einmalig in ganz Nordamerika.

Es isch de dae Tag cho, dr 24. Juni, dr "St. Jean-Baptiste", wo ds Quebec aus Nationaufiirtig fuer "la Nouvelle France" giut, dass heisst aer wird nume idr Provinz Quebec gfiiret. I ha zerscht daenkt gha, dass sig oeppe wie bi ues dr 1. Auguscht, so chlei mit Fuerwaerch u Asproche. Am Nomitag simer zu nere angere "Couchsurfere" gange wones Barbecue organisiert hett, doert si scho mou oeppe 30 Luett uftoucht. Mit dene simer naer ufd "Plaines Abraham" gange (e riesige Park), fuer es Konzaert go ds lose. I has fasch nid gloubt, doert hetts oeppe 200'000 Luet gha, wo fahneschwenkend, singend u biertrinkend iri Provinz gfiiret hei. I bi mer fasch vor cho wie ar Fuessbau WM, nume dass hie kene es Fuessbau-Trikot hett anegha, sondern die meischte es Trikot vo de Quebec Nordiques, ds ex-NHL Team vo dere Stadt. A daem Obe hani ono dr Vincent u d Florine kenneglernt, si si ou "Couchsurfer" u wohne im Momaent ds Montreal, choeme aber vo dr Bretagne. Am Tag druf si mer mit ihne, ihrne zwoei Kollege, em Sebastien und ere angere Franzoesin e chlei duer Stadt gloffe. E sunnige Katersunntig haut.

Waehrend dere Ziit woni bim Sebastien bi gsi hani mi entschlosse jetz doch es Outo ds chouffe. Auso si mer zaeme es paar Chaere go aluege, I ha mi schlussaendlech fuer e wisse 93er "Nissan Sentra" entschide. Dae hett mer dr bescht Idruck gmacht. Dr Sebastien isch de saeber id Ferie u i bi ids Hostel izoge. Nachdaem i dr Chare kouft u registriert ha gha, hani woeue e Verischerig abschliesse, dass hett sech aus praktisch unmoeglech usegsteut, wiu i nume es Tourischte-Visum ha gha. Oeppe 5 Taeg hani im Hostel umetelefoniert, verhandlet u gwartet u es hett sech eifach nuet ergaeh. Das isch eiduetig die schlimschti Zyt vo mire Reis gsi. I ha jede Tag nume probiert e Versicherig zbrcho u bi nuem viu go aluege ir Stadt. Zur Uflockerig bini aber de glich no uf Beauport gfahre, das isch dr Ort wo dr Alexandre Tremblay haerchunnt. Doert bini goe d "Chute de Montmorency" aluege, e zimlech imposante Wasserfau, wo im Winter ganz zue gfruert. Am Tag druf hetz naer aendlech klappet mit dr Versicherig u mi Trip vo Quebec City uf Vancouver hett choene losgo. Das isch scho e Ufsteuer gsi nach dene verlornige Taeg im Hostel.

Welcome to Canada

Do bini auso i daem Nachtbus ghocket Richtig Montreal und ha no die letschte 2 Staate, New Hampshire und Vermont, duerquert. Gschloffe hani fasch nuet, ha nuem choenne warte, bis i zum erschte mou cha kanadische Bode betraette. Fruech am Morge isches de so wiit gsi, mir hei muesse usstige u mitem ganze Gepaeck duere Zoll. Woni a dr Reihe bi gsi, hett mi dr Zoellner mit breitem Akzaent gfrogt: "Vous etes Suisse? Parlez vous Francais?". "Mais, bien sur" aber wiu aer anglophon gsi isch hei mer ues uf Aenglisch ungerhaute. Noechschti frog: was i im Gepaeck heig? Woni dr Rucksack ufmache, seit er i muess em nuet zeige, nume ufzeue. Mit Kamera und Chleider isch aer scho zfride gsi, vo daem Momaent a hani gwuesst, jetz bini nueme i de USA. Ufem Raescht vor Fahrt hett mer de Weizefaeuder u Burehoef gseh, bis mer naer ds Montreal acho si. Vo doert ues hani naer imne chlei luxurioesere Bus doerfe Richtig Quebec City witerfahre.

Goodbye USA

Ds Bangor bini no grad raecht zytig bim Bus-Terminal acho u ha woeue es Ticket uf Quebec City loese. Do seit mer dr Typ am Schauter i choenni nume bis Montreal loese u muess naer doert dr Bus waechsle. OK, kes Problem, gangi haut ueber Montreal anstatt diraekt uf Quebec, woni aber i Bus istige seit dr Fahrer i muess de ds Boston dr Bus waechsle. Ne nei uf Montreal giengi, hani gseit u aer hett nume gmeint, jo jo das stimmt scho. Auso bini anstatt vo Bangor diraekt nach Quebec, vo Bangor via Boston, via Montreal nach Quebec. Ungloublech we mer uf dr Charte luegt, was das fuere Umwaeg isch.


We mer scho grad vom Waeg rede, New England isch mini letschti Station gsi i de Staate. Die Route hani bis jetz zruegg gleit.

Bar Harbor, Acadia National Park

Am noechschte Tag hani mis Busticket gloest, ha aber dr Bus verpasst, waegemne technische Problem ir U-Bahn. Super, no einisch hani nid woeue 36$ fuere Nacht zahle u usserdaem hani ds Hostel ds Bar Harbor scho buecht gha. Zum Glueck hani mis Ticket no choenne umbueche fuer nach Bangor, Maine anstatt Bar Harbor, Maine. Das isch oeppe z vergliche mit Lausanne anstatt Biu, vo der Distanz haer u die am Schauter hett mer gseit i heigi o vo doert ke Bus meh uf Bar Harbor. Mir isch das egau gsi, i ha daenkt, irgendwie chume de scho doert haere. Oeppe am 9i am Obe si mer ds Bangor acho u mir isch ploetzlech i Sinn cho i choenti jo es Outo miete. Auso bini mit mim ganze Baggage vom Bus-Terminal bis zum Flughafe gloffe. Das isch oeppis zwuesche 5 u 10 Kilometer gsi. Am haubi 11i bini i mim Ford ghocket u Richtig Bar Harbor los gfahre. 100$ fuer 2 Taeg isch nid e schlaechte Priis fuer sone Chare. Nach 2 Stung fahrt und em Boxestop im BurgerKing (wo si mer sogar no gratis Frites offeriert hei), bini de aendlech acho. Ds Hostel hett zwar nid 24 Stung offe gha, aber si hei mi glich no inegloh. Totmued hani mis Bett azoge u bi naer igschlofe.

Dr noechscht Tag isch super gsi, i bi mit mim Mietobjekt um die ganzi Insle u duere Acadia National Park gfahre. Das isch eiduetig dr schoenscht Flaeck woni, bis jetzt i de USA gseh ha. Es hett Seee, Fischerdoerfli, Waeuder, Baerge, Buchte, Sandstraend u rundume dr Atlantik. Absolut empfaehlenswaert, vorauem o dr Seafood ide Fischerbeizli. Am Nomittag hett Ebbe gherrscht u ds Meer isch etlichi Meter zruegg gange. Di Iheimische si go Muschle sammle, us dene mache si dr beruehmt "New England Clam Chowder". Ds Highlight isch aber dr Sunneungergang gsi ufem hoechschte Baerg vo dr Insle. Am Tag druf bini wider zruegg uf Bangor gfahre u ha mis Outo leider wider muesse abgaeh.

Mi Ford

Fasch richtig gschribe

Ebbe

vorem Sunneungergang

Back in Boston

Zruegg ds Boston hani immer noni gwuesst, was i jetz soeu mache. Es Busticket nach Maine loese oder no e Nacht hie blibe. Woni aber gseh ha, dass ke Bus me fahrt, bini haut wider ids gliche Hostel woni scho es paar Taeg vorhaer bi gsi. Luschtigerwiis hett jetz ds Bett anstatt 30$ ploetzlech 36$ Dollar kostet, wiu i nid ueber ds Internet buechet heig. Jaenu, hani mini Rucksaeck haut i daem tuere Zimmer deponiert u bi no schnaeu veruse oeppis fuers Znacht go sueche. Per Zuefau loufeni am Baseball-Stadion verbi u d Red Sox hei grad es Spiu gha. Wo mi de e Schwarzmaerktler ahout oebi es Ticket fuer 20$ woeu choufe, hani probiert dr Priis chlei zdruecke. 5 Minute spoeter bini mit mim 12$ Ticket im Stadion gstange! D Atmosphaere isch nid schlaecht gsi, aber dr Match isch aeuae dr schlaechtischt vor ganze Saison gsi. Mir isch das egau gsi, wiu duer das hani am Schluss sogar e Logeplatz gha. Nid schlaecht 5ti Reihe fuer 12$!

Cape Cod

Dr Klaus u dr Chris hei sech de Richtig Kanada verabschidet u Ig bi chlei suedoeschtlech uf Cape Cod abe gfahre. Das isch e haub Insle wo sech i Atlantik usestreckt u mou dr Ferieort vo de Kennedy's isch gsi. Dr Busfahrer hett mi de eifach noeime am Highway usegloh u hett mer dr Waeg zum Hostel erklaert. Nach oeppe 2 Km Loufe, hani ds Hostel gfunge. Das besteit ues enere grosse Huette ir Mitti u chline Schlofhuettene rundume. Eis vo de spezieuschte Hostels bis jetz uf mire Reis u d Betriber si oberfruendlech gsi.

Am Obe hani no grad es Velo gmietet, wiu ohni Transportmittu bisch hie eifach verlore. Woni grad so am Znacht choche bi gsi, ghoeri wider oepper Duetsch rede. Es Paerli us Freiburg, wo mitem Outu duer New England reist. Mir hei de chlei gschwaetzt u drbi hett sech fuer mi zum 3. Mou e "duetschi" Mitfahrglaegeheit ergaeh!

Am noechschte Tag hani de aber no chlei oeppis vo Cape Cod woeue gseh u bi drum mit mim Bike losgfahre. D Velowaege hie si super aber leider hetts zimlech gluftet u mis Bike isch o nid grad ds Sportlechschte gsi. Trotzdaem hani a daem Tag oeppe 40 Km zruegg gleit, verbi a Luechtuerm u Fischerhuettene. Dae Usflug hett sech sicher glohnt. U am noechste Tag hani de mitt de zwoei Duetsche wider zruegg uf Boston choenne mitfahre, mit emne churze Stop in Plymouth.

Bagels, Beer and Baseball

Boston isch de meh oder weniger wie erwartet gsi. D U-bahn hie isch zimlech Antik u maengisch hett mer eifach choenne istige ohni Billet. Mir si de o grad mit dr Bahn ids Zaentrum gfahre, gnauer gseit i Boston Common. Das isch oeppe ds gliche wie dr Central Park ds New York, eifach viu chliner. Imne Bagel-Shop hei mer ueses Zmorge konsumiert, es Bagelsandwich mit Ei, Swiss-Cheese u Bacon. Das isch eifach ds beschte so ufene laere Mage. Hett eim grad motiviert e chlei go umezloufe. D Innestadt chas sech aemu lo gseh, viu schoeni auti Gebaeude im typisch britisch-irische Stiu. U vorauem hetts a jedem Egge e Uni oder es College, Boston isch DIE Unistadt i de Staate.

Usserdaem hetts hie unzaehligi Brauereie u drum si mer de o eini go aluege. Isch o meh oder weniger gratis gsi (inkl. Freibier!). Dr Tourguide hett grad am Afang gfrogt oeb oepper vo sehr wiit her cho isch. Wo mer naer "Germany and Switzerland" fuere grueft hei, isch scho mou es Raune duer d Maengi gange. D Tour isch de zimlech witzig gsi u am Schluss hetts die wou verdienti Degustation gaeh. Uesi zwoei bayrische Experte u Ig hei de o gfunge, dass "Samuel Adams" z beschte US-Amerikanische Bier isch.

Nachdaem chline Apero hei mer e Walking-Tour duer d Innestadt gmacht. Doert hett mer viu vor Gschicht vo de irische u italienische Iwanderer mitbrcho. Am Schluss hei mer im Hafe no e aechte US-Navy Zerstoerer choene bestunne. Ig aus Mitglied vo dr Swiss-Navy ha das naeturlech us Spionagezwaecke gmacht.

Am Obe si mer no ungerem Fluss duere nach Cambridge gfahre, doert isch die waeutberuehmti Uni vo Harvard. Isch scho e zimlech idrueckleche Campus, ueberau hange risigi Banner vo verschidene Verbindigi u angerne Uni-Organisatione. Jetz choei mer aemu saege, mer sige mou ds Harvard gsi, wenn o nume "zu Besuch".

Aber ds wichtigschte fuerne Bostonian isch weder e Bagel no es Bier. Ds wichtigschte hie isch Baseball! A jedem Egge u i jedem lade hangt irgendnoeime e Red-Sox Fahne. Ganz New England wird "Red Sox Nation" gnennt. Obwou si hie zwoei vo de erfougrichschte Hockey- u Basketball-Teams vo Nordamerika hei, d Red-Sox sie eifach ueberau.

Short Trip to Boston

Woni dr Chris u dr Klaus ds Chelsea bim Hostel troffe ha, hei mer ues grad zimlech viu ds verzeue gha. Immerhin isch einiges passiert, sit mer sech ds Miami verabschidet het. Nach daem churze update si mer mitem Shuttle a Newark Flughafe gfahre u hei doert ueses Gepaeck i Chare vom Chris verlade.

Auso ab ufe Highway. Ungerwaegs hei mer im Wendys no schnaeu e Burger Znacht gaesse u si de gaege Obe imne State Park acho. Doert hei mer ueses Zaeut ufgschlage u hei ues ufs Ohr gleiht. Am noechschte Morge hei mer ds ganze wider abbrotzt u si wider i Chare ghocket.

Irgendeinisch am Nomittag si mer ds Boston acho u hei im Hostel icheckt. Im Zimmer umehange und Dusche nochehole isch agseit gsi, bevor mer no churz d Innestadt si go aluege.

Back in New York City

Nachere churze Fahrt (nume oeppe 3 Stung) imne fascht laere Bus, bini wider zmitts in Manhattan ine gstange. Mitem ganze Baggage bini de mou los Richtig Chelsea gloffe, wiu i mit dr Laura doert ha abgmacht gha. Es isch Samschti Obe gsi, das heisst no meh Vouk aus suesch scho u ig ha usgseh wieni ds Matterhorn wett erklime. Woni de im Caffe wo d Laura schaffet bi acho, hani feschtgsteut, dass si doert zimlech ztue hei gha. Drum bini nochlei go d Eastside erkunde, bevor si de het Fuerobe gha u mer uf Brooklyn uebere si gfahre. Irgendwie isches komisch gsi wider a glich Ort zruegg zcho, nachdaem mer duer ds haube Land greist isch.

Uf au Faeu bini jetz scho ds dritte Mou ds NYC gsi (scho einisch vor 7 Johr) u drum hani mi scho zimlech guet zraecht gfunge. Hie isch langsam o dr Summer abroche u drum si d Luet o meh verusse i de Gartebeizli ghocket. I ha de i dene paar Taeg no woeue use finge oeb mer ds Manhattan o noieme Inlinehockey spiut. D Antwort isch jo, aber zimlech unorganisiert. Ds Chelsea hets anschinend e Liga, drum bini mou uf d Chelsea Piers usegloffe. Was i gfunge ha si zwoei Plaetz mit Bande, nume isch aber doert (im Juni!) ke Strossebelag druf gsi sondern Is! I ha mer de doerfe e mittumaessige Match aluege u bi mit eim ids Gspraech cho ueber die Liga. Wi sech usegsteut het, isch es e Ukrainer, wo gaern moechti ids College Hockey waechsle. I hane de gfrogt oeb aer dr Valery Schiriayev kenni, aber dae het ke Ahnig gha waer das isch. Aer het mi de gfrogt oeb i mou ids Freihockey woeu cho, aer heigi no e 2ti Usrueschtig. Do hani natuerlech jo gseit. Woni nem aber am noechschte Tag ha agluete, het er nid abgnoh u o suesch hani nueme vonem ghoert. De hanis haut de losi. Schad.

De isch de ono dae Obe cho, woni ds Brooklyn ir Wohnig bi ghocket u mer ploetzlech i Sinn isch cho, dass huet jo dr Stanley Cup Final im Fernseh chunnt. I ha mers de mitemne Bierli vorem TV gmuetlech gmacht u uf NBC gschaute. Nume hani mit dr Zimmerantenne nid grad die beschti Biudqualitaet gha u ha drum im Internet gluegt oebs ds Manhattan e biuigi Sportsbar het. Gfunge hani sogar e Bar wo si nume Hockey zeige. Auso bini grad nachem 1. Drittu id Metro ghocket u bi id Hell's Kitchen gfahre, so heisst dae Bezirk in Manhattan. Woni bir Adraesse wod Bar soett si bi acho, hani erfahre, dass es die Bar gar nuem git. Das cha o nume mir passiere, hani daenkt u bi haut i die noechscht beschti Bar ghocket. Doert hani wenigstens dr Match choene luege, wenn ou ohni Ton. Woni de mis 6$ Pint nachem 2. Drittu ha ustrunke gha, het mi d Barmaid gfrogt oeb i no eis wott. I ha muesse nei saege, wiu suesch wider e Mauziit waer drufgange. Die zwoei Type naebe dra hei das mitbrcho u hei gmeint i soeu eis uf ihri Raechnig trinke. Do hani natuerlech jo gseit! Die zwoei si vo Kalifornie gsi u hei ds New Jersey irgend es Gschaeftsmeeting gha.

Usserdaem hei si scho zimlech eine ar Lataerne gha. D Spiu hani nume no haub verfougt, wiu mi die aus moeglechs ueber d Schwiiz gfrogt hei. (Ungerangerem, oeb Schwiiz u Schwede nid ds gliche sigi.) I ha aemu no mitbrcho, dass Ottawa es Eigegoal kassiert het u, dass Anaheim Stanley Cup Sieger worde isch. I ha no 1-2 spaendiert brcho u ha usegfunge, dass dene ihri Raechnig sowiso ufd Spese vor Firma louft. Super! Die zwoei si de abzottlet u i ha mi ou mou ufe Heimweg gmacht. Ir Metro hani de no es paar Kunschtwaerk doerfe bestunne (siehe Bilder).

I ha mi de nach es paar Taeg vo dr Laura u ihrer Mitbewohnerin verabschidet u ha dr Chris u dr Klaus vo Bayern ir Stadt troffe. Zaeme si mer de mit ihrem Chare Richtig Boston ufbroche.