Road Trip Chicago - Albany

Zimlech "fruech" am Morge (oeppe am 9:30) hei mer ds Gepaeck verlade u si ufbroche Richtig Oste. Dr Wage isch e Toyota Corolla gsi u ghoert am Holger, dae het aer waehrend em Studium do aene brucht. Nach emne letschte Kaffee si mer Richtig Highway iboge u hei zruegg ufd Skyline vo Chicago gluegt. Es isch scho schad bini nume so churz hie gsi, die Stadt waers Waert gsi no laenger z blibe. Doch die Glaegeheit choenne mitzfahre bis uf Boston isch aebe scho lukrativ gsi i Sache Transportchoeschte. Eigentlech hani zwar uf New York City zruegg muesse, wiu i doert mit em Chris und em Klaus, wo mer ds Tampa hei troffe, ha abgmacht gha u die ou Richtig Norde hei woeue witerfahre. Aber zu daem spoeter.

Ueses erschte Ziu uf uesem Road Trip isch dr Lake Erie gsi, doert hets es paar State Parks am Wasser u die hei mer am erschte Tag woeue erreiche. Glandet si mer de zerscht ds Port Clinton im Staat Ohio, luschtigerwiis het die Region "Ottawa County" gheisse, het aber mit dr kanadische Houptstadt nuet ztuee. Port Clinton isch es gmuetlechs Fischerdoerfli am Lake Erie, auerdings si sehr viu Fisch tot am Strand umeglaege u d Hobbyfischer hei jede gfangnig Fisch wider i See gschosse. Aesse choen mer die nid, het eine gmeint, dr See sig viu ds starch verschmutzt. Mer muess bedaenke, dass a daem See die ganzi Industrie vo Detroit u Cleveland agschlosse isch. I ha ou ghoert, dass schins d Amis sech gar nid umd Verschmutzig kuemmere u sech d Kanadier unheimlech drueber ufrege, wiu d Haeufti vom See kanadisch isch. Ds Bade hei mer us de obe gnennte Gruend losi, drfuer hei mer doerfe am regionale top Sport-Event biwohne. Es Baseball-Turnier zwuesche verschiedene Dorfmannschafte. D Spieler hei komischerwiis aui duetschi Naeme uf de Trikots gha. Dr Holger het drzue gmeint, dass viu Duetschi id Region um die Grosse Seee sige usgwanderet.

Spoeter hei mer es Motel gsuecht zum uebernachte, was ds dritt no biuiger chunnt aus es Hostel, d Bett si erscht no groesser u mer het sogar es eignigs Bad! Am Obe si mer ids "Stadtzaentrum" gfahre u hei imne Pub (wo mer die einzige Touris si gsi) Burger u Bier konsumiert. Im Fernseh isch dr NBA-Haubfinau zwuesche Detroit u Cleveland gloffe, Port Clinton liet genau ir Mitti zwuesche dene beide Stedt. Obwou ds Pub haub laer gsi isch, isch mer sech vorcho wie mer saeuber im stadion wuerd hocke. D Emotione si hoech gange u ds Spiu haet usglichener nid choenne si. Dr LeBron James vo Cleveland het sini Equipe immer wider ids Spiu zruegg brocht. 2 Verlaengerige hets gae (was im Basketball sehr ungwoehnlech isch) u am Schluss hets dr James fuer Cleveland grichtet. Sogar mir aus Baskaetball-Banause si fasch vom Barhocker gheit. Am noechschte Tag hei si im Fernseh vomne ne Johrhundert-Spiu gredt. Ues het das aber denn scho nuem interessiert, wiu mer witergfahre si aebe grad richtig Cleveland. Doert si mer aber nid lang blibe, isch nid grad die Stadt womer soet gseh ha.

Irgendeinisch si mer de wider i Staat New York inne gfahre, was landschaftlech nid mit viu Aenderige verbunge isch gsi. I saege nume Faeuder, Waud, Faeuder, Waud, usw. Wo mer gaege n Obe zimlech im Cacco us si gsi, hei mer ues entschlosse wider imne Staedtli z uebernachte. Dies mou isches e Universitaets-Stadt irgendwo im Waud use gsi, Alfred het die gheisse u heig oeppe 500 Iwohner, wi mer vernoh hei. Im Summer sig das so, dr raescht vom Johr heigs zuesaetzlech oeppe 4000(!) Studaente hie. Es Motel hei mer scho gfunge gha u drum hei mer schnaeu ds Tournee gmacht im Staedtli. Es het do so oeppis wiene Dorfchaern, wos e Lade u Beize het, dr Raescht si Wohnhueser u Uni-Gebaeude. A eim Huus hets es Schiud gha "Language House" u dr Holger het doert mou gluette u gfrogt, was das genau sigi. Die wo ufgmacht het het gseit, do woni d Ustusch-Studaente waehrend em Semester. Am Schluss vo dere Konversation simer bi dene im Wohnzimmer gstange u hei mitne spoeter ir Stadt abgmacht. So schnaeu lernt mer do auso di Iheimische kenne. Dr Obe isch nid so schlaecht gsi, zerscht si mer ir Beiz gsi, de inere Bar u am Schluss im ne Club. Am noechschte Tag hei mer scho bau zum Inventar ghoert hie u drum hei mer daenkt, goe mer gschider witer.

Uf dr Fahrt si mer de no schnaeu vom ne uebermotivierte "Fruend u Haeufer" aghaute worde. Grad zwoei Chaere het aer usepfiffe, dr Holger het vo Ihm sone Foetzu brcho, wu ner muees ischicke. So wis usgseh het wird aer aber nie oeppis muesse zahle. Jaenu.

Ds Albany, ir Houpstadt vom Staat New York hei si mi de abglade a dr Greyhound Station u si witer Richtig Boston gfahre. I ha mit dr Laura (Schwoeschter vom Dimi) wider ds Brooklyn abgmacht u bi naer i Bus Richtig New York City gstiege. Dae chuerz Road Trip isch uf au Faeu super gsi u het sech o finanzieu glohnt.

Sweet Home Chicago

So, nachdaem si mi am Flughafe ds West Palm Beach zimlech usenang gno hei, (wiu ig nid Amerikaner sig u nume e Eiwaeg-Flug buechet heig, das heige drum d "Bad Guys" o gmacht) u ig naer ds Atlanta im Terminal 5 Stung lang uf mi Aschluss gwartet ha, bini de oeppe am 1oni am Obe ds Chicago glandet. Im Flueger hani no e Amerikanere kenneglernt u die het mer de erklaert welle Zug i muess nae fuer zum Hostel ds cho. Mir hei ues de verabschidet u i bi i Zug richtig Downtown ghocket. Uf dere Fahrt hani oeppe 15 mou "Sweet Home Chicago" vo de Blues Brothers uf mim iPod glost. Wo dr Zug de im "Loop", das isch ds Zaentrum vor Downtown, isch acho isch mer dr Blues Brothers Fium o biudlech wider i Erinnerig grueft worde. I gloub e imposanteri Zugfahrt hani bis jetzt i de USA noni erlaebt. Mer fahrt zwuesche de Wuechechratzer, oeppe 10 Meter ueber de Strosse, mits ids Usgangsviertu inne. Ufem Biud unger gseht mer e Teil vor Strecki, zwuesche dene Pfiler fahre si im Blues Brothers Fium dr Polizei drvo.

Um Mitternacht bini im Hostel acho u dr Typ ar Reception isch fasch ipennt, wiu er schins scho dr ganz Tag am buegle sig. I bi de naer o grad ids Naescht glaege u ha gaebig Usgschlofe.

Am noechscht Tag bini e chlei ir Stadt ume gstuerchlet u ha dr Millenium Park besichtigt. Doert hets e risige Rase gha mit ere zimlech spezieue Buehni u so Verstraebige, wo ds Liecht u d Luutspraecher dra agmacht si. Ufem Biud gseht mer dae Plaetz, wo bimne Konzaert sicher e Hammer Atmosphaere herrscht. E chlei witer aene hets e Brunne wo d Luet aspoeit u uberdimensionali Bohne, wo uf dr ganze Oberflachi d Umgaebig spieglet. Irgendwie si do es paar Expo-Erinnerige ufcho.

Gaege n Obe bini id Wrigleyville gloffe, wo ds Wrigleyfield steit, ds Baseballstadion vo de Chicago Cubs. Doert si mer Unmaenge vo Fans entgaege cho u drum hani gmeint ds Spiu sig scho fertig. Woni bim Stadion bi acho isch aber no grad ds letschte Inning gloffe u drum bini eifach inne tschaupet. Wo mi de niemer kontrolliert het, bini im ungerschte Sektor abghocket u hads letschte Inning gnosse. Glohnt hets sech ono, wiu d Cubs ufghout hei, isch no einisch richtig Stimmig ufcho. Verlore hei si de aber trotzdaem.

Am Morge druf hani bim Zmorge dr Holger us Bayern u dr Phillipp us Halle troffe. Die zwoei hei si vo Duetschland id USA cho studiere u hei e Roadtrip vo Boston uf Chicago u zruegg gmacht. Mit ihne bini die raeschtlechi Zyt ir Stadt u ide Pubs umeghanget.

Im Lake Michigan si mer ono go Bade, auerdings isches nid so warm gsi wi ds Miami im Atlantik. Drfuer hets eim abkueht u dr Strand isch ou us Sand gsi, vorauem ischer nume oeppe 5 Minute vom Zaentrum entfaernt.

Bim zruegg go hei mer no das Schiud gseh mit em Schriftzug "You are beautiful" i verschidene Sproche. Uf Duetsch hets keis gha drfuer uf Schwiizerduetsch. Unger gseht mer dr Bewiis. Die zwoei Duetsche hei dr hoecher Status vom Schwiizerduetsch gaegenueber em Hochduetsch muesse anerkenne.

Schlussaendlech hani mi dene zwoei agschlosse u mir hei ues ufe Waeg Richtig Boston gmacht. Mir hei auso "Windy City" verloh, sicher bis jetzt eini vo de schoenere Staedt woni bsuecht ha, villech isch es eifach waegem See. Chicago chani uf au faeu empfaehle, wenn dr mou ir noechi sit.

Gruess Silvan

Lake Worth

Nach ere laenge Party-Wuche ds Miami, bini de uf Lake Worth gfahre um d Familie vor Cousine vo mire Tante Dyanne go ds bsueche. Nach oeppe 4 Stung Bus und Zugfahrt bini, adr Train Station ds Lake Worth, vo dr Theresa und em Mitch abghout worde. Die Zwoei si scho zimlech locker druef, si hei aemu grad aues ueber Europa und d Schwiz woeue wuesse u bevor mer ueberhoupt zu ihne Hei si, si mer zerscht mou ids noechschte Pub. Das isch scho mou e guete Afang vo mim Ufenthaut gsi, sicher ou wiu ds Pub grad am u teilwis sogar im Wasser isch gsi.




Womer si hei cho, hani die raeschtleche Familiemitglider lehre kenne. Dr Sohn vo Theresa u Mitch heisst Austin u isch 19i , die juengschti Tochter heisst Lizzy u isch 14 und di aeutischti Tochter isch 21, wohnt aber sit churzem in San Diego. Zum Aesse isch de no dr bescht Kolleg vom Austin cho, dr Anthony. Fuer Theresa u Mitch isch aer fasch so oeppis wie ds vierte Ching. Vorem Znacht hei dr Mitch und ig, no ds Baseball-Spiu vo de Boston Red Sox in High Definition im Fernseh gluegt. Dr Biudschirm vo ihrem Fernseh isch risig, wieni aber erfahre ha isch das i de USA nume Durchschnitt. Uf au Faeu het mer dr Mitch de Regle vom Baseball erklaert, die sie e chlei komplizierter aus bim Hockey. Am Schluss bini aber nid schlaecht drus cho u ha sogar scho es paar Schpiler kennt.



Am zwoeite Obe isch dr Mitch vom Schaffe heicho (aer isch Bauingenieur bimne lokale Grossunternaemhe) u het gseit aer gieng id Sportsbar fuer nes Fuerobebier, do hani natuerlech mit muesse. Ir Bar acho si mer grad duere Lieferante-Igang inne, obwou mer nuet glieferet hei, drfuer het ues die ganzi Chuchibrigade gruesst. Ir Bar saeuber hei mer naer am Mitch si Kollegekreis troffe u dae isch zimlech gross. Eine vo dene kennt dr Bsitzer vo de Detroit Red Wings u ou es paar Schpiler, unger angerem dr Chris Chelios, dae sig aber zimlech arrogant het er gmeint. Ds Bier isch grad guet gruetscht, wos ploetzlech het gheisse mir muessi hei go aesse. Ds Znacht isch wie scho am erschte Obe super gsi u naechaer si mer wider vore Fernseh u hei bimne Budweiser ds Baseball-Spiu gluegt. Am spoetere Obe hei si de aber ou no Hockey uebertreit, ds 5te Spiu vor Serie Anaheim gaege Detroit. Dr Austin interessiert sech o zimlech fuer Hockey, drum hei mer chlei choenne Fachsimple. Dr Hasek het aber miserabel gspiut a daem Obe u drum isch Detroit o usgschide.




Am noechschte Tag hani mi entschide e Flug uf Chicago ds bueche, wius grad e zimlech biuige im Internet het gha. Zerscht hani eigentlech no woeue uf New Orleans reise, das waer aber zimlech tuer cho, wiu si no Schaede vom Hurricane ar Bahnlinie muesse repariere u ni drum haet muesse ueber Washington D.C. go chere! Auso simer ids Reisebuero go dr Flug bueche. Spoeter bini mit dr Theresa zu ihrne Eutere u Gschwuesterte gfahre. Ihre Bruetsch het mi zimlech gnau ueber d Schwiz u Europa usgfrogt, was aber no e zimlech luschtigi Diskussion isch gsi. Interessant isch vorauem immer wider z ghoere, wie die meischte Amerikaner d Nase vou hei vo dr Bush-Regierig. Es het auso scho e zimlechi Kehrtwaendi stattgfunge.





Am Tag druf bini mit Theresa u Mitch no go West Palm Beach u dr Strand vo Palm Beach aluege. Isch scho chlei angersch aus ds Miami, eifach nid so touristisch. D Motorboot hie muesse nid ufene Uferzone achte, do wird eifach froehlech im Hafe umeblochet. Es paar Fischer si am Wuermlibade gsi u hei ufe gross Fang ghofft, meischtens si aber d Pelikane erfougricher gsi u si naer fraech uf dr Muur umeghocket.





Am letschte Obe bini mit em Austin und em Anthony ane Party, vomne Kolleg vo Ihne. Wiu di meischte doert noni 21i si gsi, das aber ds Auter wo mer mues ha fuer ine Bar inne zcho, het die Party bi daem Kolleg deheim stattgfunge. Dr Wrestling-Kampf im Fernseh u es Fass Bier hei fuer Ungerhautig gsorget. I has zimlech luschtig gfunge, dass mer hie i daem Auter ds Bier no heimlech mues konsumiere, waehrenddaem mer bis ues i de Bare fasch nume no 16-Jaehrigi atrifft. Drfuer doerfe si hie mit 16ni scho Outofahre, i ha bewusst gschribe "doerfe" u nid "choene". Es isch aebe scho chlei e angere Planet.

Mi Ufenthaut ds Lake Worth isch uf jede fau super gsi, hie hani mou die richtige Amerikaner lehre kenne. Im Gaegesatz zu de Hostels wos meh Europaer het. Jetz geits aber wider i Norde uf Chicago.

Gruess Silvan