Mont-Tremblant

Nach Montreal hani mi entschide no chlei meh vo Quebec zgseh. Drum bini uf Mont-Tremblant gfahre, e Skiort noerdlech vo Montreal. D Fahrt doert haere het mi zerscht wuerklech e chlei id Wiudnis gfuehrt. Isch eifach Wahnsinn gsi, so wiit mehr gseh het nume Waud. Ds Doerfli saeuber isch zwar zimlech tuer u chlei e Retorteort, aber es het si Charme. Vorauem, dass es no amne See isch, hani super gfunge. Ds Hostel isch chlei usserhaub diraekt amne chline See glaege. Am erschte Obe hani grad es Kanu gschnappet u ha mer dr Sunneungergang ufem See inezoge. So oeppis hani no saeute gseh (siehe Bilder)! Am zwoeite Tag bini chlei im duere Parc de Mont-Tremblant gfahre, dae isch auerdings groesser gsi aus i gmeint ha u drum bini erscht spot am Obe wider im Hostel acho. Am noechschte Morge isches wider zruegg uf Montreal gange.

Small World

Dr Biodome im ehemalige Olympische Dorf bini am noechschte Tag go aluege. Dort hani aendlech live choenne ds kanadische Nationaltier bestunne: Dr Biber oder aebe "The Beaver". Zimlech witzigi Viecher ha fasch e Viertustung vorem Aquarium verbrocht. We mer bedaenkt, dass mer jo jetzt im Bielersee o eine hei, isch das scho e Zytli. Aber i wirde de dr Twanner-Biber ono mou sichte, hoffentlech. Naebebi hani no es cools Hockey-Faeld gfunge, im Parc des Veterans. (Siehe Fotos). Im Centre Bell wo d Canadiens spile, bini ono go verbi luege, aber vom Aebischer u Streit hei si leider ke T-Shirt gha.



Woni de nach es paar Taeg vo Vincent u Florine's Whonig ids Hostel umzoge bi, hani d Stadt o mou chlei uf eigeni Fuscht woeue erkunde. Ha no chlei die Egge gsuecht, wo ni noni ha gseh. Zimlech schoene Tag gsi u woni gaege Obe wider ufem Place des arts ds Jazz Festival gnosse ha, chlopft mer ploetzlech oepper ufd Schuetere. I has fasch nid choene gloube, waer steit do: dr Mischu!!! Nach es paar Minute hei mers de beidi glich gloubt u hei natuerlech einiges ds verzeue gha. Nach daem mer wider "a jour" si gsi, hei mer abgmacht, dass mer ids gliche Hostel ichecke. Auso si mer natuerlech die noechschte Tage zaeme go Montreal unsicher mache. Dr Formel-1 Kurs vo Montreal hei mer natuerlech no woeue gseh, plus ds Casino u unger angerem si mer no Fuerwaerch-Festival gsi. Nach es paar Taeg isch dr Mischu wieder uf New York zruegg, woner mitem Chaevu abgmacht het gha. I ha ne de mitem Nissan woeue zum Bus-Terminal fahre, do liit natuerlech dr Chare ab, zmitts ir stadt inne. Zum Glueck isch grad e Abschleppchare ir noechi gsi u dr Mischu isch ono bim Bus-Terminal acho. Nach emne verlornige Tag waege Reparature, hani de glich witer choenne Richtig Mont-Tremblant.

Montreal!!!!

Ds Montreal acho hani mit em Vincent und dr Florine, woni ds Quebec troffe ha, bi ihrem Appartement abgmacht. Fuer doert haere zcho hani muesse uf Rue Sherbrooke, doert bini o druf aber leider Richtig Weste u nid Oste. Ig aus Neulaenker hie ds Kanada, bi natuerlech grad zmitts id Downtown Montreal gfahre. Waers e chlei kennt, weiss, dass das verchehrstechnisch oeppe ds gliche isch wie d Innestadt vo Paris oder so. Links u Raechts si si mer um d Ohre gfahre, drfuer hani d Ehr gha grad vor dr McGill-Uni doerfe duerezfahre, dr eigentleche Geburtsstaette vom moderne Ishockey. Nach langem hin und haer bini doch no acho u ha grad doerfe dr Florine haeufe d Wohnig ds putze. Spoeter isch de dr Vincent hei cho u de si mer grad ids Apero. Am Obe si mer de no ads Jazz Festival gange, e riese Sach u zimlech viu Gratis-Konzaert zmitts ir Innestadt. Isch super gsi, oeppe wie ds Montreux.

Am noechschte Tag bini mit dene beide ufe Mont-Royal gange, das isch dr Huusbaerg vo Montreal u dae isch eifach zmitts ir Stadt inne. Mer hett e super Usblick uf Downtown u gseht eigentlech fasch bis ad Stadtgraenze. Ufem Waeg ufe hei mer es paar Eichhoernli aglockt mit Erdnussbutter u zwuesche inne hei sech o es paar Streifehoernli lo blicke. Ds luschtige a dene isch vorauem dr Name wo si hie ds Quebec hei: "Les Suisses"! Irgendwie no komisch, we di chline Ching ueberau umeruefe, "regarde les p'tits Suisses, la".

Am Obe si mer de aui zaeme ine Club gange, wo mer mit angere Couchsurfer hei abgmacht gha. Dae Club isch amne spezieue Ort gsi naemlech uf eim vo de hoechschte Gebaude ds Montreal. Vo doert us hei mer choene d Stadt ir Nacht vo obe aluege. Hett eifach super usgseh! Zoberscht ufem Wuechechratzer hetts no es Dreihliecht gha wo mer ir ganze Stadt gseht. Dr Obe isch auerdings nid sehr lang worde, wiu die meischte am Tag druf hei muesse buegle.

Quebec - Montreal

Aendlech isches losgange u i bi mit mim Nissan dr Highway duerab Richtig Montreal gfahre. Faeuder u Farme si das woni am meischte gseh ha uf dere Strecki. Ab und zue hett mer aber o wider dr St. Laurent Strom gseh. Am Obe bini uf haubem Waeg ds Trois-Rivieres acho u bi doert ufe Camping am Fluss gfahre. Ds Quebec hani am Morge no schnaeu es Zaeut une Schlofsack kouft, drum bini parat gsi fuer e chlei "Outdoor-Feeling". Ds Zaeut hani trotz ungloblech ufsaessige Mosquitos no choenne ufsteue u ha mi nachem Znacht am Fluss ufs Ohr gleit. Scho im Haubschlof ghoereni, dass si ir Stadt es Konzaert hei u nachemne Zytli lose, hani gmerkt, dass das "Good Charlotte" isch, wo spiut. Schad hani das verpasst, aber i waer sowiso zmued gsi.

Am Morge hani ds Zaeut wider abbrotzt u bi ir Stadt go Zmorge aesse. Doert hett mi eine bedient wo mou ds Lausanne uds Neuchatel heig gschaffet. Gli druf bini de Richtig Montreal witer. Doert acho bini ueber d Jaques Cartier Brueck ids Zaentrum gfahre.

Quebec City

Irgeneinisch am Vormittag bini ds Quebec City (oder eifach nume Quebec) acho u chum bini usem Bus duse gsi, bini mer vorcho wieni uf Frankrich gfloge waer. Aues isch ploetzlech wider uf Franzoesisch gschribe gsi u vo Aenglisch ke Spur. Ds Quebec hani mi entschide mou nid ines Hostel ds go u drum hani vom mim "Couchsurfing account" Gebruch gmacht woni ds Miami eroeffnet ha. "Couchsurfing" isch e Internet-site wo mer sech cha amaeude u naer cha Mitglieder uf dr ganze Waeut afroge, oeb mer bi ine choen uebernachte fuer es paar Naecht. Im Gaegezug cha mer, we mer wider deheim isch, ds gliche abiete. Zerscht hani zimlech Bedaenke gha, dass sigi sone Hippie-Sach. Isches aber ueberhoupt nid wini ha doerfe feschtsteue. Auso hanis mou probiert u am Sebastien Tremblay vo Quebec gschribe. Dae hett mer zruegg gschribe u so hett sechs de ergaeh, dass i bi ihm ha choene ufem Sofa uebernachte fuer oeppe 5 Taeg oder so. Obwou aer Tremlbay heisst, isch aer mitem Meisterschuetz vom EHCB nid verwandt, Aer hett mer erklaert, dass Tremblay dr huefigscht Nachname in Quebec sigi.

Nachdaem i bi ihm ir Wohnig acho bi, hei mer Znacht gaesse u si ner mit sine Kollege ids lokale Pub gange. Doert hett e Kollegin vom Sebastien Geburi gfiiret, duer das hani grad zimlech viu Quebecois kenneglernt. Die si au zimlech guet druffe u vorauem o zimlech schnaeu im Bierkonsum. Uf dr chline Buehni im Pub hett eine typischi Quebecois Lieder gspiut u drum isch d Stimmig raecht guet gsi. Am Schluss vom Obe hani de de Iheimische no muesse zeige, waer dr meischter im Billiard isch u nachdaem si mer de langsam hei gloffe.

Am noechscht Tag hett dr Sebastien wider gschaffet u i bi chli god Stadt erkunde. D Autstadt isch eifach zimlech Europaeisch, hie stoe gloub die aeutischte Gebaeude vo Nordamerika. D Innestadt isch aber zimlech touristisch, i ha gloub nonie so viu Souvenir-Shops i eire Stross gseh. Ds Highlight vor Autstadt isch aber eiduetig ds "Chateau Frontenac", wo usgseht wi nes riesigs Schloss, drin isch aber es Luxushotel. Vo dr "Terrasse Dufferin" gseht mer naer ufe St. Laurent Fluss abe. Das isch scho zimlech imposant gsi. D "Citadelle" isch es angers Highlight vo dere Stadt, e auti Feschtig vo de Aenglaender wo mer vo usse gar nid gseht, wiu si ine Grashuegeu ine bout isch. Ds ganze franzoesische Flair vo dere Stadt isch scho einmalig in ganz Nordamerika.

Es isch de dae Tag cho, dr 24. Juni, dr "St. Jean-Baptiste", wo ds Quebec aus Nationaufiirtig fuer "la Nouvelle France" giut, dass heisst aer wird nume idr Provinz Quebec gfiiret. I ha zerscht daenkt gha, dass sig oeppe wie bi ues dr 1. Auguscht, so chlei mit Fuerwaerch u Asproche. Am Nomitag simer zu nere angere "Couchsurfere" gange wones Barbecue organisiert hett, doert si scho mou oeppe 30 Luett uftoucht. Mit dene simer naer ufd "Plaines Abraham" gange (e riesige Park), fuer es Konzaert go ds lose. I has fasch nid gloubt, doert hetts oeppe 200'000 Luet gha, wo fahneschwenkend, singend u biertrinkend iri Provinz gfiiret hei. I bi mer fasch vor cho wie ar Fuessbau WM, nume dass hie kene es Fuessbau-Trikot hett anegha, sondern die meischte es Trikot vo de Quebec Nordiques, ds ex-NHL Team vo dere Stadt. A daem Obe hani ono dr Vincent u d Florine kenneglernt, si si ou "Couchsurfer" u wohne im Momaent ds Montreal, choeme aber vo dr Bretagne. Am Tag druf si mer mit ihne, ihrne zwoei Kollege, em Sebastien und ere angere Franzoesin e chlei duer Stadt gloffe. E sunnige Katersunntig haut.

Waehrend dere Ziit woni bim Sebastien bi gsi hani mi entschlosse jetz doch es Outo ds chouffe. Auso si mer zaeme es paar Chaere go aluege, I ha mi schlussaendlech fuer e wisse 93er "Nissan Sentra" entschide. Dae hett mer dr bescht Idruck gmacht. Dr Sebastien isch de saeber id Ferie u i bi ids Hostel izoge. Nachdaem i dr Chare kouft u registriert ha gha, hani woeue e Verischerig abschliesse, dass hett sech aus praktisch unmoeglech usegsteut, wiu i nume es Tourischte-Visum ha gha. Oeppe 5 Taeg hani im Hostel umetelefoniert, verhandlet u gwartet u es hett sech eifach nuet ergaeh. Das isch eiduetig die schlimschti Zyt vo mire Reis gsi. I ha jede Tag nume probiert e Versicherig zbrcho u bi nuem viu go aluege ir Stadt. Zur Uflockerig bini aber de glich no uf Beauport gfahre, das isch dr Ort wo dr Alexandre Tremblay haerchunnt. Doert bini goe d "Chute de Montmorency" aluege, e zimlech imposante Wasserfau, wo im Winter ganz zue gfruert. Am Tag druf hetz naer aendlech klappet mit dr Versicherig u mi Trip vo Quebec City uf Vancouver hett choene losgo. Das isch scho e Ufsteuer gsi nach dene verlornige Taeg im Hostel.

Welcome to Canada

Do bini auso i daem Nachtbus ghocket Richtig Montreal und ha no die letschte 2 Staate, New Hampshire und Vermont, duerquert. Gschloffe hani fasch nuet, ha nuem choenne warte, bis i zum erschte mou cha kanadische Bode betraette. Fruech am Morge isches de so wiit gsi, mir hei muesse usstige u mitem ganze Gepaeck duere Zoll. Woni a dr Reihe bi gsi, hett mi dr Zoellner mit breitem Akzaent gfrogt: "Vous etes Suisse? Parlez vous Francais?". "Mais, bien sur" aber wiu aer anglophon gsi isch hei mer ues uf Aenglisch ungerhaute. Noechschti frog: was i im Gepaeck heig? Woni dr Rucksack ufmache, seit er i muess em nuet zeige, nume ufzeue. Mit Kamera und Chleider isch aer scho zfride gsi, vo daem Momaent a hani gwuesst, jetz bini nueme i de USA. Ufem Raescht vor Fahrt hett mer de Weizefaeuder u Burehoef gseh, bis mer naer ds Montreal acho si. Vo doert ues hani naer imne chlei luxurioesere Bus doerfe Richtig Quebec City witerfahre.

Goodbye USA

Ds Bangor bini no grad raecht zytig bim Bus-Terminal acho u ha woeue es Ticket uf Quebec City loese. Do seit mer dr Typ am Schauter i choenni nume bis Montreal loese u muess naer doert dr Bus waechsle. OK, kes Problem, gangi haut ueber Montreal anstatt diraekt uf Quebec, woni aber i Bus istige seit dr Fahrer i muess de ds Boston dr Bus waechsle. Ne nei uf Montreal giengi, hani gseit u aer hett nume gmeint, jo jo das stimmt scho. Auso bini anstatt vo Bangor diraekt nach Quebec, vo Bangor via Boston, via Montreal nach Quebec. Ungloublech we mer uf dr Charte luegt, was das fuere Umwaeg isch.


We mer scho grad vom Waeg rede, New England isch mini letschti Station gsi i de Staate. Die Route hani bis jetz zruegg gleit.

Bar Harbor, Acadia National Park

Am noechschte Tag hani mis Busticket gloest, ha aber dr Bus verpasst, waegemne technische Problem ir U-Bahn. Super, no einisch hani nid woeue 36$ fuere Nacht zahle u usserdaem hani ds Hostel ds Bar Harbor scho buecht gha. Zum Glueck hani mis Ticket no choenne umbueche fuer nach Bangor, Maine anstatt Bar Harbor, Maine. Das isch oeppe z vergliche mit Lausanne anstatt Biu, vo der Distanz haer u die am Schauter hett mer gseit i heigi o vo doert ke Bus meh uf Bar Harbor. Mir isch das egau gsi, i ha daenkt, irgendwie chume de scho doert haere. Oeppe am 9i am Obe si mer ds Bangor acho u mir isch ploetzlech i Sinn cho i choenti jo es Outo miete. Auso bini mit mim ganze Baggage vom Bus-Terminal bis zum Flughafe gloffe. Das isch oeppis zwuesche 5 u 10 Kilometer gsi. Am haubi 11i bini i mim Ford ghocket u Richtig Bar Harbor los gfahre. 100$ fuer 2 Taeg isch nid e schlaechte Priis fuer sone Chare. Nach 2 Stung fahrt und em Boxestop im BurgerKing (wo si mer sogar no gratis Frites offeriert hei), bini de aendlech acho. Ds Hostel hett zwar nid 24 Stung offe gha, aber si hei mi glich no inegloh. Totmued hani mis Bett azoge u bi naer igschlofe.

Dr noechscht Tag isch super gsi, i bi mit mim Mietobjekt um die ganzi Insle u duere Acadia National Park gfahre. Das isch eiduetig dr schoenscht Flaeck woni, bis jetzt i de USA gseh ha. Es hett Seee, Fischerdoerfli, Waeuder, Baerge, Buchte, Sandstraend u rundume dr Atlantik. Absolut empfaehlenswaert, vorauem o dr Seafood ide Fischerbeizli. Am Nomittag hett Ebbe gherrscht u ds Meer isch etlichi Meter zruegg gange. Di Iheimische si go Muschle sammle, us dene mache si dr beruehmt "New England Clam Chowder". Ds Highlight isch aber dr Sunneungergang gsi ufem hoechschte Baerg vo dr Insle. Am Tag druf bini wider zruegg uf Bangor gfahre u ha mis Outo leider wider muesse abgaeh.

Mi Ford

Fasch richtig gschribe

Ebbe

vorem Sunneungergang

Back in Boston

Zruegg ds Boston hani immer noni gwuesst, was i jetz soeu mache. Es Busticket nach Maine loese oder no e Nacht hie blibe. Woni aber gseh ha, dass ke Bus me fahrt, bini haut wider ids gliche Hostel woni scho es paar Taeg vorhaer bi gsi. Luschtigerwiis hett jetz ds Bett anstatt 30$ ploetzlech 36$ Dollar kostet, wiu i nid ueber ds Internet buechet heig. Jaenu, hani mini Rucksaeck haut i daem tuere Zimmer deponiert u bi no schnaeu veruse oeppis fuers Znacht go sueche. Per Zuefau loufeni am Baseball-Stadion verbi u d Red Sox hei grad es Spiu gha. Wo mi de e Schwarzmaerktler ahout oebi es Ticket fuer 20$ woeu choufe, hani probiert dr Priis chlei zdruecke. 5 Minute spoeter bini mit mim 12$ Ticket im Stadion gstange! D Atmosphaere isch nid schlaecht gsi, aber dr Match isch aeuae dr schlaechtischt vor ganze Saison gsi. Mir isch das egau gsi, wiu duer das hani am Schluss sogar e Logeplatz gha. Nid schlaecht 5ti Reihe fuer 12$!