Cape Cod

Dr Klaus u dr Chris hei sech de Richtig Kanada verabschidet u Ig bi chlei suedoeschtlech uf Cape Cod abe gfahre. Das isch e haub Insle wo sech i Atlantik usestreckt u mou dr Ferieort vo de Kennedy's isch gsi. Dr Busfahrer hett mi de eifach noeime am Highway usegloh u hett mer dr Waeg zum Hostel erklaert. Nach oeppe 2 Km Loufe, hani ds Hostel gfunge. Das besteit ues enere grosse Huette ir Mitti u chline Schlofhuettene rundume. Eis vo de spezieuschte Hostels bis jetz uf mire Reis u d Betriber si oberfruendlech gsi.

Am Obe hani no grad es Velo gmietet, wiu ohni Transportmittu bisch hie eifach verlore. Woni grad so am Znacht choche bi gsi, ghoeri wider oepper Duetsch rede. Es Paerli us Freiburg, wo mitem Outu duer New England reist. Mir hei de chlei gschwaetzt u drbi hett sech fuer mi zum 3. Mou e "duetschi" Mitfahrglaegeheit ergaeh!

Am noechschte Tag hani de aber no chlei oeppis vo Cape Cod woeue gseh u bi drum mit mim Bike losgfahre. D Velowaege hie si super aber leider hetts zimlech gluftet u mis Bike isch o nid grad ds Sportlechschte gsi. Trotzdaem hani a daem Tag oeppe 40 Km zruegg gleit, verbi a Luechtuerm u Fischerhuettene. Dae Usflug hett sech sicher glohnt. U am noechste Tag hani de mitt de zwoei Duetsche wider zruegg uf Boston choenne mitfahre, mit emne churze Stop in Plymouth.

Bagels, Beer and Baseball

Boston isch de meh oder weniger wie erwartet gsi. D U-bahn hie isch zimlech Antik u maengisch hett mer eifach choenne istige ohni Billet. Mir si de o grad mit dr Bahn ids Zaentrum gfahre, gnauer gseit i Boston Common. Das isch oeppe ds gliche wie dr Central Park ds New York, eifach viu chliner. Imne Bagel-Shop hei mer ueses Zmorge konsumiert, es Bagelsandwich mit Ei, Swiss-Cheese u Bacon. Das isch eifach ds beschte so ufene laere Mage. Hett eim grad motiviert e chlei go umezloufe. D Innestadt chas sech aemu lo gseh, viu schoeni auti Gebaeude im typisch britisch-irische Stiu. U vorauem hetts a jedem Egge e Uni oder es College, Boston isch DIE Unistadt i de Staate.

Usserdaem hetts hie unzaehligi Brauereie u drum si mer de o eini go aluege. Isch o meh oder weniger gratis gsi (inkl. Freibier!). Dr Tourguide hett grad am Afang gfrogt oeb oepper vo sehr wiit her cho isch. Wo mer naer "Germany and Switzerland" fuere grueft hei, isch scho mou es Raune duer d Maengi gange. D Tour isch de zimlech witzig gsi u am Schluss hetts die wou verdienti Degustation gaeh. Uesi zwoei bayrische Experte u Ig hei de o gfunge, dass "Samuel Adams" z beschte US-Amerikanische Bier isch.

Nachdaem chline Apero hei mer e Walking-Tour duer d Innestadt gmacht. Doert hett mer viu vor Gschicht vo de irische u italienische Iwanderer mitbrcho. Am Schluss hei mer im Hafe no e aechte US-Navy Zerstoerer choene bestunne. Ig aus Mitglied vo dr Swiss-Navy ha das naeturlech us Spionagezwaecke gmacht.

Am Obe si mer no ungerem Fluss duere nach Cambridge gfahre, doert isch die waeutberuehmti Uni vo Harvard. Isch scho e zimlech idrueckleche Campus, ueberau hange risigi Banner vo verschidene Verbindigi u angerne Uni-Organisatione. Jetz choei mer aemu saege, mer sige mou ds Harvard gsi, wenn o nume "zu Besuch".

Aber ds wichtigschte fuerne Bostonian isch weder e Bagel no es Bier. Ds wichtigschte hie isch Baseball! A jedem Egge u i jedem lade hangt irgendnoeime e Red-Sox Fahne. Ganz New England wird "Red Sox Nation" gnennt. Obwou si hie zwoei vo de erfougrichschte Hockey- u Basketball-Teams vo Nordamerika hei, d Red-Sox sie eifach ueberau.

Short Trip to Boston

Woni dr Chris u dr Klaus ds Chelsea bim Hostel troffe ha, hei mer ues grad zimlech viu ds verzeue gha. Immerhin isch einiges passiert, sit mer sech ds Miami verabschidet het. Nach daem churze update si mer mitem Shuttle a Newark Flughafe gfahre u hei doert ueses Gepaeck i Chare vom Chris verlade.

Auso ab ufe Highway. Ungerwaegs hei mer im Wendys no schnaeu e Burger Znacht gaesse u si de gaege Obe imne State Park acho. Doert hei mer ueses Zaeut ufgschlage u hei ues ufs Ohr gleiht. Am noechschte Morge hei mer ds ganze wider abbrotzt u si wider i Chare ghocket.

Irgendeinisch am Nomittag si mer ds Boston acho u hei im Hostel icheckt. Im Zimmer umehange und Dusche nochehole isch agseit gsi, bevor mer no churz d Innestadt si go aluege.

Back in New York City

Nachere churze Fahrt (nume oeppe 3 Stung) imne fascht laere Bus, bini wider zmitts in Manhattan ine gstange. Mitem ganze Baggage bini de mou los Richtig Chelsea gloffe, wiu i mit dr Laura doert ha abgmacht gha. Es isch Samschti Obe gsi, das heisst no meh Vouk aus suesch scho u ig ha usgseh wieni ds Matterhorn wett erklime. Woni de im Caffe wo d Laura schaffet bi acho, hani feschtgsteut, dass si doert zimlech ztue hei gha. Drum bini nochlei go d Eastside erkunde, bevor si de het Fuerobe gha u mer uf Brooklyn uebere si gfahre. Irgendwie isches komisch gsi wider a glich Ort zruegg zcho, nachdaem mer duer ds haube Land greist isch.

Uf au Faeu bini jetz scho ds dritte Mou ds NYC gsi (scho einisch vor 7 Johr) u drum hani mi scho zimlech guet zraecht gfunge. Hie isch langsam o dr Summer abroche u drum si d Luet o meh verusse i de Gartebeizli ghocket. I ha de i dene paar Taeg no woeue use finge oeb mer ds Manhattan o noieme Inlinehockey spiut. D Antwort isch jo, aber zimlech unorganisiert. Ds Chelsea hets anschinend e Liga, drum bini mou uf d Chelsea Piers usegloffe. Was i gfunge ha si zwoei Plaetz mit Bande, nume isch aber doert (im Juni!) ke Strossebelag druf gsi sondern Is! I ha mer de doerfe e mittumaessige Match aluege u bi mit eim ids Gspraech cho ueber die Liga. Wi sech usegsteut het, isch es e Ukrainer, wo gaern moechti ids College Hockey waechsle. I hane de gfrogt oeb aer dr Valery Schiriayev kenni, aber dae het ke Ahnig gha waer das isch. Aer het mi de gfrogt oeb i mou ids Freihockey woeu cho, aer heigi no e 2ti Usrueschtig. Do hani natuerlech jo gseit. Woni nem aber am noechschte Tag ha agluete, het er nid abgnoh u o suesch hani nueme vonem ghoert. De hanis haut de losi. Schad.

De isch de ono dae Obe cho, woni ds Brooklyn ir Wohnig bi ghocket u mer ploetzlech i Sinn isch cho, dass huet jo dr Stanley Cup Final im Fernseh chunnt. I ha mers de mitemne Bierli vorem TV gmuetlech gmacht u uf NBC gschaute. Nume hani mit dr Zimmerantenne nid grad die beschti Biudqualitaet gha u ha drum im Internet gluegt oebs ds Manhattan e biuigi Sportsbar het. Gfunge hani sogar e Bar wo si nume Hockey zeige. Auso bini grad nachem 1. Drittu id Metro ghocket u bi id Hell's Kitchen gfahre, so heisst dae Bezirk in Manhattan. Woni bir Adraesse wod Bar soett si bi acho, hani erfahre, dass es die Bar gar nuem git. Das cha o nume mir passiere, hani daenkt u bi haut i die noechscht beschti Bar ghocket. Doert hani wenigstens dr Match choene luege, wenn ou ohni Ton. Woni de mis 6$ Pint nachem 2. Drittu ha ustrunke gha, het mi d Barmaid gfrogt oeb i no eis wott. I ha muesse nei saege, wiu suesch wider e Mauziit waer drufgange. Die zwoei Type naebe dra hei das mitbrcho u hei gmeint i soeu eis uf ihri Raechnig trinke. Do hani natuerlech jo gseit! Die zwoei si vo Kalifornie gsi u hei ds New Jersey irgend es Gschaeftsmeeting gha.

Usserdaem hei si scho zimlech eine ar Lataerne gha. D Spiu hani nume no haub verfougt, wiu mi die aus moeglechs ueber d Schwiiz gfrogt hei. (Ungerangerem, oeb Schwiiz u Schwede nid ds gliche sigi.) I ha aemu no mitbrcho, dass Ottawa es Eigegoal kassiert het u, dass Anaheim Stanley Cup Sieger worde isch. I ha no 1-2 spaendiert brcho u ha usegfunge, dass dene ihri Raechnig sowiso ufd Spese vor Firma louft. Super! Die zwoei si de abzottlet u i ha mi ou mou ufe Heimweg gmacht. Ir Metro hani de no es paar Kunschtwaerk doerfe bestunne (siehe Bilder).

I ha mi de nach es paar Taeg vo dr Laura u ihrer Mitbewohnerin verabschidet u ha dr Chris u dr Klaus vo Bayern ir Stadt troffe. Zaeme si mer de mit ihrem Chare Richtig Boston ufbroche.

Road Trip Chicago - Albany

Zimlech "fruech" am Morge (oeppe am 9:30) hei mer ds Gepaeck verlade u si ufbroche Richtig Oste. Dr Wage isch e Toyota Corolla gsi u ghoert am Holger, dae het aer waehrend em Studium do aene brucht. Nach emne letschte Kaffee si mer Richtig Highway iboge u hei zruegg ufd Skyline vo Chicago gluegt. Es isch scho schad bini nume so churz hie gsi, die Stadt waers Waert gsi no laenger z blibe. Doch die Glaegeheit choenne mitzfahre bis uf Boston isch aebe scho lukrativ gsi i Sache Transportchoeschte. Eigentlech hani zwar uf New York City zruegg muesse, wiu i doert mit em Chris und em Klaus, wo mer ds Tampa hei troffe, ha abgmacht gha u die ou Richtig Norde hei woeue witerfahre. Aber zu daem spoeter.

Ueses erschte Ziu uf uesem Road Trip isch dr Lake Erie gsi, doert hets es paar State Parks am Wasser u die hei mer am erschte Tag woeue erreiche. Glandet si mer de zerscht ds Port Clinton im Staat Ohio, luschtigerwiis het die Region "Ottawa County" gheisse, het aber mit dr kanadische Houptstadt nuet ztuee. Port Clinton isch es gmuetlechs Fischerdoerfli am Lake Erie, auerdings si sehr viu Fisch tot am Strand umeglaege u d Hobbyfischer hei jede gfangnig Fisch wider i See gschosse. Aesse choen mer die nid, het eine gmeint, dr See sig viu ds starch verschmutzt. Mer muess bedaenke, dass a daem See die ganzi Industrie vo Detroit u Cleveland agschlosse isch. I ha ou ghoert, dass schins d Amis sech gar nid umd Verschmutzig kuemmere u sech d Kanadier unheimlech drueber ufrege, wiu d Haeufti vom See kanadisch isch. Ds Bade hei mer us de obe gnennte Gruend losi, drfuer hei mer doerfe am regionale top Sport-Event biwohne. Es Baseball-Turnier zwuesche verschiedene Dorfmannschafte. D Spieler hei komischerwiis aui duetschi Naeme uf de Trikots gha. Dr Holger het drzue gmeint, dass viu Duetschi id Region um die Grosse Seee sige usgwanderet.

Spoeter hei mer es Motel gsuecht zum uebernachte, was ds dritt no biuiger chunnt aus es Hostel, d Bett si erscht no groesser u mer het sogar es eignigs Bad! Am Obe si mer ids "Stadtzaentrum" gfahre u hei imne Pub (wo mer die einzige Touris si gsi) Burger u Bier konsumiert. Im Fernseh isch dr NBA-Haubfinau zwuesche Detroit u Cleveland gloffe, Port Clinton liet genau ir Mitti zwuesche dene beide Stedt. Obwou ds Pub haub laer gsi isch, isch mer sech vorcho wie mer saeuber im stadion wuerd hocke. D Emotione si hoech gange u ds Spiu haet usglichener nid choenne si. Dr LeBron James vo Cleveland het sini Equipe immer wider ids Spiu zruegg brocht. 2 Verlaengerige hets gae (was im Basketball sehr ungwoehnlech isch) u am Schluss hets dr James fuer Cleveland grichtet. Sogar mir aus Baskaetball-Banause si fasch vom Barhocker gheit. Am noechschte Tag hei si im Fernseh vomne ne Johrhundert-Spiu gredt. Ues het das aber denn scho nuem interessiert, wiu mer witergfahre si aebe grad richtig Cleveland. Doert si mer aber nid lang blibe, isch nid grad die Stadt womer soet gseh ha.

Irgendeinisch si mer de wider i Staat New York inne gfahre, was landschaftlech nid mit viu Aenderige verbunge isch gsi. I saege nume Faeuder, Waud, Faeuder, Waud, usw. Wo mer gaege n Obe zimlech im Cacco us si gsi, hei mer ues entschlosse wider imne Staedtli z uebernachte. Dies mou isches e Universitaets-Stadt irgendwo im Waud use gsi, Alfred het die gheisse u heig oeppe 500 Iwohner, wi mer vernoh hei. Im Summer sig das so, dr raescht vom Johr heigs zuesaetzlech oeppe 4000(!) Studaente hie. Es Motel hei mer scho gfunge gha u drum hei mer schnaeu ds Tournee gmacht im Staedtli. Es het do so oeppis wiene Dorfchaern, wos e Lade u Beize het, dr Raescht si Wohnhueser u Uni-Gebaeude. A eim Huus hets es Schiud gha "Language House" u dr Holger het doert mou gluette u gfrogt, was das genau sigi. Die wo ufgmacht het het gseit, do woni d Ustusch-Studaente waehrend em Semester. Am Schluss vo dere Konversation simer bi dene im Wohnzimmer gstange u hei mitne spoeter ir Stadt abgmacht. So schnaeu lernt mer do auso di Iheimische kenne. Dr Obe isch nid so schlaecht gsi, zerscht si mer ir Beiz gsi, de inere Bar u am Schluss im ne Club. Am noechschte Tag hei mer scho bau zum Inventar ghoert hie u drum hei mer daenkt, goe mer gschider witer.

Uf dr Fahrt si mer de no schnaeu vom ne uebermotivierte "Fruend u Haeufer" aghaute worde. Grad zwoei Chaere het aer usepfiffe, dr Holger het vo Ihm sone Foetzu brcho, wu ner muees ischicke. So wis usgseh het wird aer aber nie oeppis muesse zahle. Jaenu.

Ds Albany, ir Houpstadt vom Staat New York hei si mi de abglade a dr Greyhound Station u si witer Richtig Boston gfahre. I ha mit dr Laura (Schwoeschter vom Dimi) wider ds Brooklyn abgmacht u bi naer i Bus Richtig New York City gstiege. Dae chuerz Road Trip isch uf au Faeu super gsi u het sech o finanzieu glohnt.

Sweet Home Chicago

So, nachdaem si mi am Flughafe ds West Palm Beach zimlech usenang gno hei, (wiu ig nid Amerikaner sig u nume e Eiwaeg-Flug buechet heig, das heige drum d "Bad Guys" o gmacht) u ig naer ds Atlanta im Terminal 5 Stung lang uf mi Aschluss gwartet ha, bini de oeppe am 1oni am Obe ds Chicago glandet. Im Flueger hani no e Amerikanere kenneglernt u die het mer de erklaert welle Zug i muess nae fuer zum Hostel ds cho. Mir hei ues de verabschidet u i bi i Zug richtig Downtown ghocket. Uf dere Fahrt hani oeppe 15 mou "Sweet Home Chicago" vo de Blues Brothers uf mim iPod glost. Wo dr Zug de im "Loop", das isch ds Zaentrum vor Downtown, isch acho isch mer dr Blues Brothers Fium o biudlech wider i Erinnerig grueft worde. I gloub e imposanteri Zugfahrt hani bis jetzt i de USA noni erlaebt. Mer fahrt zwuesche de Wuechechratzer, oeppe 10 Meter ueber de Strosse, mits ids Usgangsviertu inne. Ufem Biud unger gseht mer e Teil vor Strecki, zwuesche dene Pfiler fahre si im Blues Brothers Fium dr Polizei drvo.

Um Mitternacht bini im Hostel acho u dr Typ ar Reception isch fasch ipennt, wiu er schins scho dr ganz Tag am buegle sig. I bi de naer o grad ids Naescht glaege u ha gaebig Usgschlofe.

Am noechscht Tag bini e chlei ir Stadt ume gstuerchlet u ha dr Millenium Park besichtigt. Doert hets e risige Rase gha mit ere zimlech spezieue Buehni u so Verstraebige, wo ds Liecht u d Luutspraecher dra agmacht si. Ufem Biud gseht mer dae Plaetz, wo bimne Konzaert sicher e Hammer Atmosphaere herrscht. E chlei witer aene hets e Brunne wo d Luet aspoeit u uberdimensionali Bohne, wo uf dr ganze Oberflachi d Umgaebig spieglet. Irgendwie si do es paar Expo-Erinnerige ufcho.

Gaege n Obe bini id Wrigleyville gloffe, wo ds Wrigleyfield steit, ds Baseballstadion vo de Chicago Cubs. Doert si mer Unmaenge vo Fans entgaege cho u drum hani gmeint ds Spiu sig scho fertig. Woni bim Stadion bi acho isch aber no grad ds letschte Inning gloffe u drum bini eifach inne tschaupet. Wo mi de niemer kontrolliert het, bini im ungerschte Sektor abghocket u hads letschte Inning gnosse. Glohnt hets sech ono, wiu d Cubs ufghout hei, isch no einisch richtig Stimmig ufcho. Verlore hei si de aber trotzdaem.

Am Morge druf hani bim Zmorge dr Holger us Bayern u dr Phillipp us Halle troffe. Die zwoei hei si vo Duetschland id USA cho studiere u hei e Roadtrip vo Boston uf Chicago u zruegg gmacht. Mit ihne bini die raeschtlechi Zyt ir Stadt u ide Pubs umeghanget.

Im Lake Michigan si mer ono go Bade, auerdings isches nid so warm gsi wi ds Miami im Atlantik. Drfuer hets eim abkueht u dr Strand isch ou us Sand gsi, vorauem ischer nume oeppe 5 Minute vom Zaentrum entfaernt.

Bim zruegg go hei mer no das Schiud gseh mit em Schriftzug "You are beautiful" i verschidene Sproche. Uf Duetsch hets keis gha drfuer uf Schwiizerduetsch. Unger gseht mer dr Bewiis. Die zwoei Duetsche hei dr hoecher Status vom Schwiizerduetsch gaegenueber em Hochduetsch muesse anerkenne.

Schlussaendlech hani mi dene zwoei agschlosse u mir hei ues ufe Waeg Richtig Boston gmacht. Mir hei auso "Windy City" verloh, sicher bis jetzt eini vo de schoenere Staedt woni bsuecht ha, villech isch es eifach waegem See. Chicago chani uf au faeu empfaehle, wenn dr mou ir noechi sit.

Gruess Silvan

Lake Worth

Nach ere laenge Party-Wuche ds Miami, bini de uf Lake Worth gfahre um d Familie vor Cousine vo mire Tante Dyanne go ds bsueche. Nach oeppe 4 Stung Bus und Zugfahrt bini, adr Train Station ds Lake Worth, vo dr Theresa und em Mitch abghout worde. Die Zwoei si scho zimlech locker druef, si hei aemu grad aues ueber Europa und d Schwiz woeue wuesse u bevor mer ueberhoupt zu ihne Hei si, si mer zerscht mou ids noechschte Pub. Das isch scho mou e guete Afang vo mim Ufenthaut gsi, sicher ou wiu ds Pub grad am u teilwis sogar im Wasser isch gsi.




Womer si hei cho, hani die raeschtleche Familiemitglider lehre kenne. Dr Sohn vo Theresa u Mitch heisst Austin u isch 19i , die juengschti Tochter heisst Lizzy u isch 14 und di aeutischti Tochter isch 21, wohnt aber sit churzem in San Diego. Zum Aesse isch de no dr bescht Kolleg vom Austin cho, dr Anthony. Fuer Theresa u Mitch isch aer fasch so oeppis wie ds vierte Ching. Vorem Znacht hei dr Mitch und ig, no ds Baseball-Spiu vo de Boston Red Sox in High Definition im Fernseh gluegt. Dr Biudschirm vo ihrem Fernseh isch risig, wieni aber erfahre ha isch das i de USA nume Durchschnitt. Uf au Faeu het mer dr Mitch de Regle vom Baseball erklaert, die sie e chlei komplizierter aus bim Hockey. Am Schluss bini aber nid schlaecht drus cho u ha sogar scho es paar Schpiler kennt.



Am zwoeite Obe isch dr Mitch vom Schaffe heicho (aer isch Bauingenieur bimne lokale Grossunternaemhe) u het gseit aer gieng id Sportsbar fuer nes Fuerobebier, do hani natuerlech mit muesse. Ir Bar acho si mer grad duere Lieferante-Igang inne, obwou mer nuet glieferet hei, drfuer het ues die ganzi Chuchibrigade gruesst. Ir Bar saeuber hei mer naer am Mitch si Kollegekreis troffe u dae isch zimlech gross. Eine vo dene kennt dr Bsitzer vo de Detroit Red Wings u ou es paar Schpiler, unger angerem dr Chris Chelios, dae sig aber zimlech arrogant het er gmeint. Ds Bier isch grad guet gruetscht, wos ploetzlech het gheisse mir muessi hei go aesse. Ds Znacht isch wie scho am erschte Obe super gsi u naechaer si mer wider vore Fernseh u hei bimne Budweiser ds Baseball-Spiu gluegt. Am spoetere Obe hei si de aber ou no Hockey uebertreit, ds 5te Spiu vor Serie Anaheim gaege Detroit. Dr Austin interessiert sech o zimlech fuer Hockey, drum hei mer chlei choenne Fachsimple. Dr Hasek het aber miserabel gspiut a daem Obe u drum isch Detroit o usgschide.




Am noechschte Tag hani mi entschide e Flug uf Chicago ds bueche, wius grad e zimlech biuige im Internet het gha. Zerscht hani eigentlech no woeue uf New Orleans reise, das waer aber zimlech tuer cho, wiu si no Schaede vom Hurricane ar Bahnlinie muesse repariere u ni drum haet muesse ueber Washington D.C. go chere! Auso simer ids Reisebuero go dr Flug bueche. Spoeter bini mit dr Theresa zu ihrne Eutere u Gschwuesterte gfahre. Ihre Bruetsch het mi zimlech gnau ueber d Schwiz u Europa usgfrogt, was aber no e zimlech luschtigi Diskussion isch gsi. Interessant isch vorauem immer wider z ghoere, wie die meischte Amerikaner d Nase vou hei vo dr Bush-Regierig. Es het auso scho e zimlechi Kehrtwaendi stattgfunge.





Am Tag druf bini mit Theresa u Mitch no go West Palm Beach u dr Strand vo Palm Beach aluege. Isch scho chlei angersch aus ds Miami, eifach nid so touristisch. D Motorboot hie muesse nid ufene Uferzone achte, do wird eifach froehlech im Hafe umeblochet. Es paar Fischer si am Wuermlibade gsi u hei ufe gross Fang ghofft, meischtens si aber d Pelikane erfougricher gsi u si naer fraech uf dr Muur umeghocket.





Am letschte Obe bini mit em Austin und em Anthony ane Party, vomne Kolleg vo Ihne. Wiu di meischte doert noni 21i si gsi, das aber ds Auter wo mer mues ha fuer ine Bar inne zcho, het die Party bi daem Kolleg deheim stattgfunge. Dr Wrestling-Kampf im Fernseh u es Fass Bier hei fuer Ungerhautig gsorget. I has zimlech luschtig gfunge, dass mer hie i daem Auter ds Bier no heimlech mues konsumiere, waehrenddaem mer bis ues i de Bare fasch nume no 16-Jaehrigi atrifft. Drfuer doerfe si hie mit 16ni scho Outofahre, i ha bewusst gschribe "doerfe" u nid "choene". Es isch aebe scho chlei e angere Planet.

Mi Ufenthaut ds Lake Worth isch uf jede fau super gsi, hie hani mou die richtige Amerikaner lehre kenne. Im Gaegesatz zu de Hostels wos meh Europaer het. Jetz geits aber wider i Norde uf Chicago.

Gruess Silvan

Jazz Hostel on South Beach

Sorry, ha lang nuet meh gschribe. Das soett sech jetz aber wider aendere.

Wo mer ds Miami acho si hei mer zerscht eigentlech ids Jazz Hostel a dr South Beach woeue. Doch leider het das fuere erscht Obe ke Bett meh frei gha, de si mer haut ids Clay Hostel. Doert ischs aber zimlech tuerer gsi u de hei mer de am Maentig ids Jazz Hostel gwaechslet.


Scho nach wenige Stunde hei mer doert die erschte Luet lehre kenne. D Atmosphaere i daem Hostel isch eifach viu besser gsi aus i fasch aune angere bishaerige Hostels. Aus erschtes hei mer e Duetsche u e Hollaender troffe, der Earnay u dr Roof, plus no 2 Duetschi wo mer aber scho im Hostel ds Tampa churz troffe hei, dr Chris u dr Klaus. Mit Ihne si mer de ou am erscht Obe scho chlei i Usgang. A daem Obe isch auerdings nid so viu los gsi u drum si mer eifach ufdr Terrasse vor dr Bar ghocket, hei eis gno u chlei gschnurret. Ussert ues si no e Peruaner, sini argentinischi Fruendin, e Oeschtricher u e Duetsche wo im Hostel schafft mitcho. Isch auso e rein europaeisch-suedamerikanische Usgang gsi.



Am noechscht Obe isch de scho zimlech meh gloffe, denn si mer i dae Club wo "The Mark" heisst. Dismou mit waesentlech meh Luet vom Hostel, wahrschinlech wiu d Froue bis Mitternacht gratis Drinks brcho hei. Mir hei aber mit 2ne Schwedinne und ere Amerikanere e Deal gmacht, dass sie ues d Drinks hole u mir ine drfuer d Toblerone (wo mer ds Zueri am Flughafe kouft hei) ueberloe. Die ganzi Truppe vom Hostel hets sech zaeme gsetzt us Duetsche, Schwedinne, Daeninne, Brite, Hollaender, Belgier, Amis, usw. u natuerlech ues 2ne "Swiss Guys". Mir hei ues de ou zimlech heimisch gfueht doert, wiu die ganzi Wang mit emne Bergpanorama und ere Schwizerflagge (jo si isch sogar quadratisch gsi!) ueberdeckt isch gsi, wie mer ufem Biud gseht. Ueberau hets Biuder vo ehemalige Schifahrer gha u zwuesch ine hets sogar gschneit usere Schneekanone. Bie mer fasch vorcho wie ds Waenge im Schoenegg, fuer die wo wuesse was i meine. Isch aemu e guete Obe gsi u de si mer de irgend einisch am Morge zruegg ids Hostel.




Dr bescht Obe isch aber ischer dae gsi, wo mer ids "Dek23" si gange. E chlei exklusivere Klub, mit Bierprise um die 10 Dollar! Zum Glueck isch ne aber ds Stromnetz zaeme broche u de hets fuer e haub Stung gheisse "Open Bar" (aues gratis!). Do hei mir aus Budgettourischte natuerlech maechtig zuegschlage, so ische de cho das deu chlei laenger brucht hei fuer zum noechschte Club ds loufe. Jaenu, jede faus hei mers guet gha. Neu drbi gsi bi uesere Truppe si 2 Franzose, e Kanadier vo Montreal u 2 Duetschi (jo scho wider Duetschi) Girls.



Am Tag hei mer lang usgschloffe u si naer meischtens a Strand. Zwueschine hei mer mitem Earnay no uesi Chochkuenscht unger Bewiis gsteut. Mir si de o d Starchoech vom Hostel gsi, mit uesne Shrimps anere Knoblouch-Butter-Sauce oder uesne Kotelette anere Champignon-Sauce.




Die letschte paar Tag im Jazz Hostel si nuem so spezieu gsi, wiu aui uesi Kollege scho vor abgreist si. Am Zischti si de o mer gange, dr Mischu isch uf San Diego gfloge u i bi uf Lake Worth gfahre mitem Zug. Das isch auso o ds Aendi vo ueser gmeinsame Reis gsi. Es isch e luschtige u erfahrigsriche Monet gsi u mir hei e guete Abschluss gha im Jazz Hostel. Zum Glueck gseh ni dr Mischu jo schpoetischtens im Septaember wider uf dr Stehrampi ds Biu im Isstadion. (Allez Allez Allez oooo, oder so aehnlech)

Gruess id Schwiz

Welcome to Miami

Nachdaem mer ds Tampa im Hostel, mitem ne Pilot us Chile, e chlini Whiskey-Degustation absolviert hei, si mer am Tag druf Richtig Miami ufbroche. Dasmou zerschte Mou mit dr Bahn. "Amtrak" heisst di US-amerikanischi SBB, isch aber mit dere i Sache Puenktlechkeit u Regumaessigkeit ueberhoupt nid z vergliche. Vo Tampa uf Miami fahrt nume ei Zug pro Tag. Es isch immerhin biuiger u schneuer gsi aus dr Greyhound-Bus, nume leider hets i uesem Abteil kes Faenschter gha. Nach guet 5 Stung Zugwand astarre, si mer de ds Miami acho.

Am Bahnhof hei mer de wenigschtens grad e Bus verwuetscht, wo zum Hostel ar South Beach gfahre isch. Aber o das het oeppe angerhaub Stung duret. Ds Hostel hei mer de aber grad gfunge und nachem ichecke si mer de o grad ufd Gass. U wiu mer grad am Samschti Obe si acho, isch natuerlech einiges los gsi.


Am Ocean Drive und ar Washington Avenue hets unzaehligi Nachtclubs, Bars und Restaurants. Uf em Ocean Drive fahre die tuerschte und spezieuschte Outos ume. Sogar e Low Rider hei mer gseh! Dae het dr Chare so choenne luepfe, dass eis Rad ganz ir Luft gsi isch! (siehe unten)



Am Tag druf hei mer de zerscht mou dr Strand unsicher gmacht. Ds Waetter isch zimlech sunnig gsi u ds Meer relativ ruhig. Do ligeni so ir Sunne u ploetzlech hout mi eine a, vo wo das mir de sige. Wo ni "Switzerland" antworte, frogt aer mi doch tatsaechlech, oeb i ou mitem "Icehockey-Team" do sig! Aer sig drum geschter mit zwoeine Schwizer Ishockeyspiler im Usgang gsi. Nach laengerer Diskussion steut sech use, dass aer dr Ronnie Ruegger kennt! Waer dr zwoeit isch gsi, hei mer leider nid usegfunge. Aber drfuer hei mer dr Umberto (so heisst dae Typ) kenne glehrt. Aer wohnt ds Washington D.C. u het ds Miami e Wohnig. Aer u sini Fruendin, e Australiere, hei ues de woeue uf nes Bier ilade. Am Obe si mer de churz bi Ihne uf dr Terrasse eis go naeh. Naer si mer no chlei i Usgang. Leider het aber am Sunnti Obe nume no e Schwule-Bar offe gha. De si mer haut go nes Bier hole u si uf dr Terrasse abghocket.


Am Maenti isch d South Beach wie usgstorbe gsi, kenni Luet uf de Strosse u nume weni am Strand. Ds "Zmorge" hei mer oepe am 12:00 ufem Raseplatz zwuesche Strand und Ocean Drive abghaute u si naer e chlei ids Gras glaege. E typische Kater-Maentig.



Naechaer si mer chlei go d Art Deco Architektur bestune. Das gseht oepe so us wie ds Biu afangs Bahnhofstross oder wie d Huesser bim Seevorstadt-Kreisu, nume vie farbiger.



Doert hei mer de ou die komische Toeffli gsichtet, wo mer do unger ufem Foto gseht. Nei Seich. Si natuerlech Velo-Solex!